متكونش جزء منها ولا تديها مسكنات

خطوتك الأولى إذا أردت تغيير منظومه فاسده لا ترضيك هي أنك حينما تصبح صاحب قرار وفي موقع مسئوليه : لا تكن جزءاً من المنظومه .
ففي التدوينه الماضيه عرضت لبعض أمثلة الفساد الإداري والإخلاقي نراها في مجتمعنا بكثافه وتكرار كنتيجه إما لفساد المنظومه القائمه أو فشلها وترهلها , وكانت الأمثله متفاوته في تدرجها وفي كل مثال منها كان هناك من المبررات المقبوله عقلاً التي تعطي العذر لبعض التسامح أمام هذه التجاوزات حرصاً على مصلحة الفئات المطحونه التي لم تراعيها المنظومه على الإطلاق وأجبرتها على التجاوز.

وعشان فيه ناس بتتخنق من اللغه العربيه بتاعتي دي وعشان انا عاوز استمع لأكبر قدر من آرائكم فهنتكلم بالعاميه المره دي , انا طلبت من حضراتكم آرائكم حوالين التجاوزات دي وعن هيكون ايه تصرفك لو كنت انت المسئول في مكان بيحصل فيه تجاوز من ناس تعبانه وفقيره ومضطره للتجاوز إذا صح التعبير , وحبيت أحتفظ برأيي انا للآخر عشان اسمع آرائكم بحريه والحقيقه اني بشكر جدا كل اللي علق وأثرى الموضوع بوجهة نظره , وطبعا حصل زي ما انا توقعت تفاوتت الآراء من الصرامه اللي لا تلتفت للظروف إطلاقا إلى المرونه اللي متخلش بمصلحة العمل مرورا بالوسطيه والبعد الإنساني اللي لازم يتوفر في كل مدير ناجح .

وقبل ما اقولكم رأيي ايه في الموضوع ده , خلوني اقول اني عرضت جزء أو مشهد واحد من الصوره , تعالوا بقى نكمل الصوره للآخر واشوف هل هتتغير وجهة نظركم ولا لأ :
في مثال البطاله المقنعه ممكن حد يشوف : وفيها ايه يعني مش حرام لما موظفين من غير شغل ومش لاقيين حاجه يعملوها ومرتباتهم مش مقضياهم انهم ميحضروش كل يوم عشان يوفروا أو عشان يشتغلوا شغلانه تانيه تساعدهم على الحياه , طيب ,جميل , وطبعا حضرتك مرن ومشيتها بس تعالى نتخيل بقى لما يجيلك تفتيش من الوزاره أو جهات إداريه عليا , هتعمل ايه يا ترى ؟ أقولك : هتأكد على الكل انه يحضر ويتخذ موقعه ولو التفتيش طب فجأه هتحاول تستدعيهم بالتليفون وانت مرتبك وزي اللي عامل عمله , وطبعا لازم دفاتر الحضور والإنصراف عندك تبقى مظبوطه ومتوقعه والناس مش موجوده وكله بيوقع لبعضه وهنيالك يا فاعل الخير والثواب , ولو اتسألت طبعا هتكدب وتقول انه كل تمام , شوفت قد ايه حاجات غلط؟ : كذب وغش وتزوير مره واحده , الأخطر من كده إنك إتعاملت بإنسانيه وثقه وكانت نيتك سليمه بس الشيطان نيته مش سليمه يعني لو وز واحد من اللي بيتمضيله وهو مش موجود بجريمه وقاله ولا حد هييجي جنبك ده انت هتثبت بالأوراق الرسميه انك كنت في الشغل , ساعتها يبقى ازيك بقى ؟

طب ممكن حضرتك تعيد نظر في مفهوم الإنسانيه لما تعرف ان مراقب حركة القطارات في حادثة العياط الأخيره ساب مكانه قبل معاده بخمسين دقيقه بس عشان يروح في آخر قطر بيقف على بلدهم عشان مرتبه ميكفيش انه يروح مواصلات كل يوم بالليل ؟؟

طب جربت مره تبقى بتجري جوه التاكسي وانت رايح محطة رمسيس من كتر ما الدنيا زحمه ومخنوقه وبتجري بعد ما نزلت من التاكسي وانت بتعبر صعودا وهبوطا من رصيف لرصيف ونفسك تلحق القطر اللي هيوصلك بلدكم وعندك بكره إرتباطات رهيبه ولما وصلت قبل معاد القطر بنصف ساعه ملحقتش تحجز برضه عشان لما روحت شباك التذاكر لقيت عليه أمة من الناس يحجزون ومفيش غير موظف واحد وبقية الموظفين مستئذنين عشان بيشتغلوا شغلانات تانيه عشان يقدروا يكفوا ولادهم ؟ تفتكر هتعذرهم ساعتها ؟ تفتكر لو معاك والدتك المسنه اللي متقدرش تقف جوه القطر مهما كنت إنسان هتسامحهم ؟ ولا هتلعن ابو البلد السايبه اللي مفيهاش نظام ؟

طب عارف إن الساعي اللي كان مرتبه ميه وعشرين جنيه وعاوز يعمل عمليه لإبنه فكان بيكرم اللي يديله بقشيش بس ويخدمه بعينيه كان بيطلع من البقشيش تلات أضعاف مرتبه , تفتكر بعد ما يعمل العمليه لإبنه هيرجع تاني يقنع بالميه وعشرين جنيه وهو قدامه انه يكسب ربعميه وخمسميه ويمكن أكتر ولا هيمشي بنفس الأسلوب بس بدل ما عشان يعمل لإبنه عمليه هيبقى عشان يجيبله موبايل المره دي , وتفتكر كام واحد من زمايله هيشوفه ويقلده سواء عنده نفس ظروفه أو لأ ؟

الخلاصه إنه مفيش أي ظرف يندرج تحت بند الإنسانيه يبيح التجاوز مطلقاً ولا لأي درجه حتى لو كانت من وجهة نظرك تافهه وبسيطه , واللي بعض الناس بتشوفه قسوه أو كلكعه وعقد هو ده الصح و السليم تماما , ومتفهمش لا تكن جزءا من المنظومه إنك تتمرد عليها وعلى قوانينها ولوايحها الظالمه من وجهة نظرك , لأ لأن المنظومه زي ما هي فاسده وفاشله بظلم قوانينها وعدم صلاحيتها فهي فاسده كمان بالتجاوز والإهمال في اللوايح والقوانين , فإذا كنت مش انت اللي بتحط القوانين فبلاش تبقى جزء من منظومة الإهمال على الأقل

طبعاً أنا عارف ان كتير عاوزين يقولوا طب والغلابه واللي مش لاقيين احنا كده بنقهرهم زياده ودي مش إنسانيه وياعم اللي ايده في الميه مش زي اللي ايده في النار وكل الكلام ده , بس بجد احنا لما بنسمح للتجاوز عشان خاطر متصورين اننا بنعالج مشاكل الناس فأحنا بالعكس بنزود مشاكلهم مش بنعالجها ,الإنسانيه اللي لازم تبقى موجوده هي إنسانية موقف أو حاله أو محاولة مساعده وتفكير في حل مبتكر ميخلش بالنظام إنما لو بقت عاده وسيستم شغل فبكده احنا بس بنديهم مسكنات تخدرهم شويه لحد ما الألم يفوقهم بصدمه تانيه أشد أو حتى المسكنات تنسيهم إنهم أصلا عيانين ومرضانين ومحتاجين علاج وإنهم يبقوا بني آدمين محترمين , والنتيجه ان ناس كتير ماشيه في الشارع مش عارفه اصلا انها محتاجه علاج وإصلاح لحياتها من كتر ما هي واخده مسكنات وبرشام حقيقي أو معنوي

الأصل أن تصدر المشكله لمن صنعها لا أن تساعده في حلها , بمعنى إنه في كثير من الأحيان من مصلحة الناس إنها تعاني ومتلاقيش حباية المسكن عشان تصرخ , تصرخ بقى فتعتصم وتضرب وتشد الحكومه من ديلها عشان تبصلها ,تصرخ بإنها تجتهد أكتر وتدور أكتر وتحاول تصلح حياتها وتبتكر فيها أكتر وأكتر , تصرخ بإنها تمسك في رقبة عضو مجلس الشعب اللي مش عارف يغير حاجه من احوالهم وقوانينهم اللي حاكماهم على رأي سومه في تعليقها , أو حتى تصرخ بأنها تبقى أوعى و تروح تنتخب حد بينفع وبيغير من أول عضو المحليات لحد سيادة الريس ,
أن يتحول الألم والمعاناه إلى قوه دافعه تساعد على التغيير بطريقة وجع ساعه ولا كل ساعه أحسن من حالة المرض المزمن اللي مبيخفش اللي الناس عايشه بيها دي , مش كده ولا إيه ؟