متكونش جزء منها ولا تديها مسكنات

خطوتك الأولى إذا أردت تغيير منظومه فاسده لا ترضيك هي أنك حينما تصبح صاحب قرار وفي موقع مسئوليه : لا تكن جزءاً من المنظومه .
ففي التدوينه الماضيه عرضت لبعض أمثلة الفساد الإداري والإخلاقي نراها في مجتمعنا بكثافه وتكرار كنتيجه إما لفساد المنظومه القائمه أو فشلها وترهلها , وكانت الأمثله متفاوته في تدرجها وفي كل مثال منها كان هناك من المبررات المقبوله عقلاً التي تعطي العذر لبعض التسامح أمام هذه التجاوزات حرصاً على مصلحة الفئات المطحونه التي لم تراعيها المنظومه على الإطلاق وأجبرتها على التجاوز.

وعشان فيه ناس بتتخنق من اللغه العربيه بتاعتي دي وعشان انا عاوز استمع لأكبر قدر من آرائكم فهنتكلم بالعاميه المره دي , انا طلبت من حضراتكم آرائكم حوالين التجاوزات دي وعن هيكون ايه تصرفك لو كنت انت المسئول في مكان بيحصل فيه تجاوز من ناس تعبانه وفقيره ومضطره للتجاوز إذا صح التعبير , وحبيت أحتفظ برأيي انا للآخر عشان اسمع آرائكم بحريه والحقيقه اني بشكر جدا كل اللي علق وأثرى الموضوع بوجهة نظره , وطبعا حصل زي ما انا توقعت تفاوتت الآراء من الصرامه اللي لا تلتفت للظروف إطلاقا إلى المرونه اللي متخلش بمصلحة العمل مرورا بالوسطيه والبعد الإنساني اللي لازم يتوفر في كل مدير ناجح .

وقبل ما اقولكم رأيي ايه في الموضوع ده , خلوني اقول اني عرضت جزء أو مشهد واحد من الصوره , تعالوا بقى نكمل الصوره للآخر واشوف هل هتتغير وجهة نظركم ولا لأ :
في مثال البطاله المقنعه ممكن حد يشوف : وفيها ايه يعني مش حرام لما موظفين من غير شغل ومش لاقيين حاجه يعملوها ومرتباتهم مش مقضياهم انهم ميحضروش كل يوم عشان يوفروا أو عشان يشتغلوا شغلانه تانيه تساعدهم على الحياه , طيب ,جميل , وطبعا حضرتك مرن ومشيتها بس تعالى نتخيل بقى لما يجيلك تفتيش من الوزاره أو جهات إداريه عليا , هتعمل ايه يا ترى ؟ أقولك : هتأكد على الكل انه يحضر ويتخذ موقعه ولو التفتيش طب فجأه هتحاول تستدعيهم بالتليفون وانت مرتبك وزي اللي عامل عمله , وطبعا لازم دفاتر الحضور والإنصراف عندك تبقى مظبوطه ومتوقعه والناس مش موجوده وكله بيوقع لبعضه وهنيالك يا فاعل الخير والثواب , ولو اتسألت طبعا هتكدب وتقول انه كل تمام , شوفت قد ايه حاجات غلط؟ : كذب وغش وتزوير مره واحده , الأخطر من كده إنك إتعاملت بإنسانيه وثقه وكانت نيتك سليمه بس الشيطان نيته مش سليمه يعني لو وز واحد من اللي بيتمضيله وهو مش موجود بجريمه وقاله ولا حد هييجي جنبك ده انت هتثبت بالأوراق الرسميه انك كنت في الشغل , ساعتها يبقى ازيك بقى ؟

طب ممكن حضرتك تعيد نظر في مفهوم الإنسانيه لما تعرف ان مراقب حركة القطارات في حادثة العياط الأخيره ساب مكانه قبل معاده بخمسين دقيقه بس عشان يروح في آخر قطر بيقف على بلدهم عشان مرتبه ميكفيش انه يروح مواصلات كل يوم بالليل ؟؟

طب جربت مره تبقى بتجري جوه التاكسي وانت رايح محطة رمسيس من كتر ما الدنيا زحمه ومخنوقه وبتجري بعد ما نزلت من التاكسي وانت بتعبر صعودا وهبوطا من رصيف لرصيف ونفسك تلحق القطر اللي هيوصلك بلدكم وعندك بكره إرتباطات رهيبه ولما وصلت قبل معاد القطر بنصف ساعه ملحقتش تحجز برضه عشان لما روحت شباك التذاكر لقيت عليه أمة من الناس يحجزون ومفيش غير موظف واحد وبقية الموظفين مستئذنين عشان بيشتغلوا شغلانات تانيه عشان يقدروا يكفوا ولادهم ؟ تفتكر هتعذرهم ساعتها ؟ تفتكر لو معاك والدتك المسنه اللي متقدرش تقف جوه القطر مهما كنت إنسان هتسامحهم ؟ ولا هتلعن ابو البلد السايبه اللي مفيهاش نظام ؟

طب عارف إن الساعي اللي كان مرتبه ميه وعشرين جنيه وعاوز يعمل عمليه لإبنه فكان بيكرم اللي يديله بقشيش بس ويخدمه بعينيه كان بيطلع من البقشيش تلات أضعاف مرتبه , تفتكر بعد ما يعمل العمليه لإبنه هيرجع تاني يقنع بالميه وعشرين جنيه وهو قدامه انه يكسب ربعميه وخمسميه ويمكن أكتر ولا هيمشي بنفس الأسلوب بس بدل ما عشان يعمل لإبنه عمليه هيبقى عشان يجيبله موبايل المره دي , وتفتكر كام واحد من زمايله هيشوفه ويقلده سواء عنده نفس ظروفه أو لأ ؟

الخلاصه إنه مفيش أي ظرف يندرج تحت بند الإنسانيه يبيح التجاوز مطلقاً ولا لأي درجه حتى لو كانت من وجهة نظرك تافهه وبسيطه , واللي بعض الناس بتشوفه قسوه أو كلكعه وعقد هو ده الصح و السليم تماما , ومتفهمش لا تكن جزءا من المنظومه إنك تتمرد عليها وعلى قوانينها ولوايحها الظالمه من وجهة نظرك , لأ لأن المنظومه زي ما هي فاسده وفاشله بظلم قوانينها وعدم صلاحيتها فهي فاسده كمان بالتجاوز والإهمال في اللوايح والقوانين , فإذا كنت مش انت اللي بتحط القوانين فبلاش تبقى جزء من منظومة الإهمال على الأقل

طبعاً أنا عارف ان كتير عاوزين يقولوا طب والغلابه واللي مش لاقيين احنا كده بنقهرهم زياده ودي مش إنسانيه وياعم اللي ايده في الميه مش زي اللي ايده في النار وكل الكلام ده , بس بجد احنا لما بنسمح للتجاوز عشان خاطر متصورين اننا بنعالج مشاكل الناس فأحنا بالعكس بنزود مشاكلهم مش بنعالجها ,الإنسانيه اللي لازم تبقى موجوده هي إنسانية موقف أو حاله أو محاولة مساعده وتفكير في حل مبتكر ميخلش بالنظام إنما لو بقت عاده وسيستم شغل فبكده احنا بس بنديهم مسكنات تخدرهم شويه لحد ما الألم يفوقهم بصدمه تانيه أشد أو حتى المسكنات تنسيهم إنهم أصلا عيانين ومرضانين ومحتاجين علاج وإنهم يبقوا بني آدمين محترمين , والنتيجه ان ناس كتير ماشيه في الشارع مش عارفه اصلا انها محتاجه علاج وإصلاح لحياتها من كتر ما هي واخده مسكنات وبرشام حقيقي أو معنوي

الأصل أن تصدر المشكله لمن صنعها لا أن تساعده في حلها , بمعنى إنه في كثير من الأحيان من مصلحة الناس إنها تعاني ومتلاقيش حباية المسكن عشان تصرخ , تصرخ بقى فتعتصم وتضرب وتشد الحكومه من ديلها عشان تبصلها ,تصرخ بإنها تجتهد أكتر وتدور أكتر وتحاول تصلح حياتها وتبتكر فيها أكتر وأكتر , تصرخ بإنها تمسك في رقبة عضو مجلس الشعب اللي مش عارف يغير حاجه من احوالهم وقوانينهم اللي حاكماهم على رأي سومه في تعليقها , أو حتى تصرخ بأنها تبقى أوعى و تروح تنتخب حد بينفع وبيغير من أول عضو المحليات لحد سيادة الريس ,
أن يتحول الألم والمعاناه إلى قوه دافعه تساعد على التغيير بطريقة وجع ساعه ولا كل ساعه أحسن من حالة المرض المزمن اللي مبيخفش اللي الناس عايشه بيها دي , مش كده ولا إيه ؟

ماذا تفعل لو كنت مكانه ؟

من السهل أن تؤمن بشعارت لكن من الصعب أن تنفذها
من السهل أن تتبنى قيماً ومباديء لكن من الصعب في ظل منظومه فاسده أن تطبقها

أنا لا أكتب هذه العبارات لأقر ما فيها ولكن لنتناقش حولها , بلغه سهله : هل الإصرار على تنفيذ القانون والإلتزام بالقواعد في مجتمع لا يلتزم غالبية أهله بالقواعد والقوانين إيماناً منهم بأنها لا تراعي أبسط حقوقهم وإحتياجاتهم , هل يكون الإصرار في هذه الحاله مضراً للفئات الضعيفه والفقيره أم نافعاً لها ؟ بمعنى لو كنت في موقع مسؤليه وتريد أن تطبق ما تراه في صالح العمل وما يراعي ضميرك لكن لأن المنظومه الموضوعه فاسده أو فاشله فكان ما تريد تطبيقه هذا وتؤمن بأحقيته فعلاً يضر بمرؤسيك ومن هم تحت سلطتك , هل تصر عليه للنهايه إيماناً منك بأن المصلحه المجتمعيه مقدمه على المصلحه الفرديه أم أنك ستتنازل رحمة بمن معك ومراعاة لظروفهم وهم على كل حال جزء من المجتمع الذي تريد مصلحته ؟

أعرف أن المسأله بحاجه إلى المزيد من التوضيح , ولكي تتضح الصوره أكثر أطرح عليكم بعض الأمثله :

لو كنت مسئولاً عن مجموعة موظفين يلزمهم القانون بالتواجد في العمل يومياً , لكن لأنهم موظفين على طريقة البطاله المقنعه , فإن تواجد واحد أو إثنين منهم فقط قادر على تسيير العمل دون مشكلات كبيره لذلك فهم يتناوبون الحضور فيما بينهم , ربما تريد أنت أن تلتزم وتجعلهم يحضرون للعمل يومياً وبالكامل لكن لو عرفت أن رواتبهم لا تتجاوز مأئه وخمسين جنيه ويتكلفون يومياً في مواصلات الذهاب والعوده ثلاثة جنيهات ! , ترى هل ستغير رأيك ولو قليلاً ؟

لو كان القانون يلزمك أن تمنع موظفين معك تشملهم التأمينات الإجتماعيه المعروفه أن يعملوا بأكثر من مهنه في وقت واحد , هل ستمنعهم إذا علمت أنهم براتب المهنتين وربما الثلاثه يعيشون بالكاد ولا يتجاوزون حد الكفاف ؟

عرفت أن أحد السعاه في مكتبك أو شركتك إشتهر بأنه يساعد أكثر العملاء الذين يمنحونه مالاً , هل تقوم برفده أو معاقبته ؟ وهل ستغير رأيك إذا علمت أنه يجمع مالاً من أجل إجراء عمليه جراحيه لأحد أبناءه لم يجد سبيلاً آخر لجمع تكاليفها ؟

هذه أمثله نكاد نراها جميعنا كل يوم , ومتأكد أن في رؤسكم مثلها الكثير , في زمان صار فيه الصواب والخطأ وجهات نظر ومحل إجتهاد ولم تعد المسافه فيه بين الحق والباطل عريضه , ما هي رؤيتك ؟ أي من المديرين أو القاده تحب أن تكون القاسي الملتزم من وجهة نظر الناس أم الرحيم المرن اللي بيمشي أموره ؟

لن أبدأ بذكر رأيي حتى أستمع لبعض آرائكم وحتى لا أشوش على رؤيتكم , وأرجو أن لا يقول لي قائل لابد أن نغير المنظومه كلها , لأن ردي هيكون ما انا عارف!! , لكن السؤال قبل أن تتغير هذه المنظومه اللعينه , كيف ستتصرف أنت ؟

ولنا هنا وقفه

أصدق ما سمعت خلال الفتره الماضيه كانت عباره قالها لي أحد المندوبين خلال حوار قصير دار بيني وبينه داخل الصيدليه كان الحوار كالتالي : هو يدخل مبتسماً ولكنك تستطيع أن ترى في إبتسامته ومشيته البطيئه علامات لا تختبأ من الإحباط والملل
أنا انهض من مقعدي متثاقلاً ومبتسماً رغماً عني ولا يُخفي مظهري أنني أعاني من نفس مشاعر الإحباط والملل
حوار صامت بالعين فقط أثناء الإبتسام يقول منه : عارف إن منتجاتي مش ماشيه وإن الشغل نايم وانك مش مبسوط اني جيت بس شغلي
ويقول مني : عارف إنه مش ذنبك مشاكل العالم المجتمعه في دماغي وهتخليني مش ودود معاك بس إعذرني
مصافحه بارده
ثم نص الحوار :
هو : صباح الخير يا دكتور معاك فلان الفلاني من شركة كذا
انا : صباح النور ازيك يا فلان عامل إيه
هو : الحمد لله يا دكتور أخبار الشغل إيه
انا : والله الحمد لله الشغل هادي شويه بس ماشي الحال
هو : وأخبار منتجاتنا عند حضرتك إيه
انا : الحمد لله بس لسه موجوده مخلصتش يعني
هو : بس انا ملاحظ إن الصنف الفلاني مش موجود والعلاني عندك منه علبه واحده تحب نعمل أوردر صغير كده ؟
انا : والله يا فلان آديك شايف الشغل مش تمام اليومين دول خلينا شويه كده , إن شاء الله اعملك اوردر بس ربنا يعدي اليومين دول على خير بس
هو بكل تلقائيه وصدق وإستسلام : والله يا دكتور ربنا يعدي أيام العمر كلها على خير

بس مش مهم بقى إيه اللي إتقال بعد كده ولا الحوار إنتهى إزاي , لأن الجمله العبقريه اللي فاتت دي كانت هي أهم حاجه في الحوار كله , جمله بسيطه لخصت حاله بمر بيها كتير اليومين دول , الجمله دي انا حبيتها قوي وحسيتها قوي وصدقتها قوي قوي , وفي بالي وبكررها على طول من وقتها , فعلا
ربنا يعدي أيام العمر كلها على خير
------------------------------------------------------------
أنا أجازه كده لفتره قد تطول وقد تقصر , عشان عندي كل أنواع التعب , دعواتكم بقى , في أمان الله

كلام في الحب

لا تستطيع أن تعرف ما إذا كنت تحب حباً حقيقياً أم لا إلا إذا وجدت نفسك تسامح رغماً عنك من تحبه , أن تتأمل لحظات الخلاف لتجد أنك فيها أيضاً تحبه , عندما يؤلمك فتحبه , عندما يهجرك فتسعى إليه وتحبه , عندما يظلمك فتغفر له وتحبه ,
فالحب علاقة ليست ككل العلاقات , علاقه لا تقوم على تبادل المصالح , فقد تسعد مع من تحب ليله وقد تحزن بسببه ليال ولكنك وبالرغم من ذلك تكره البعد عنه وتظل مع أحزانك تحبه

عندما أسألك لماذا تحبها فتقول لأنها مطيعه أو حنونه أو جميله فأنت لا تحبها حقاً إنما أنت تحب الطاعه والحنان والجمال , عندما اسألكِ لماذا تحبينه فتقولين لأنه عطوف أو ظريف أو وسيم فأنتي لا تحبينه وإنما تحبين العطف وخفة الظل والوسامه

لا أقتنع أن المحب لا يسامح ولا ينسى ولا يغفر , ولا يمكنني تخيل أن الحب يعلو في أوقات الراحه والسعاده ويهبط في أوقات العناء والضيق كما منحنى بياني في كراس تلميذ ولكنني أراه دائماً كالخط المستقيم يهبط فقط عندما يفقد طرف من الطرفين أو كلاهما ثقته في حب الآخر وإخلاصه , ويرتفع بالتفاهم والتجاوز والموده

لا أقول أن المحبين يجب أن يتعايشوا مع الألم والحزن , ولكن اقول أنهم يجب أن يؤمنوا بأن الحياه لا تمضي دونهما
لا أدعوا المحبين أن يتفقون في كل الأمور ولكن أدعوهم أن يسعوا إلى الإتفاق وأن لا يبخل كل طرف بجهد حتى يصلا إليه وأن يظلوا أثناء رحلة الوصول إليه محبين

لا تتمنى في من تحبه أن يشبهك فإذا كنت تريد من يشبهك فأجلس في بيت اهلك وستجد في إخوتك غايتك , أو عش وحيداً إن كنت تعتقد أنك النموذج الأمثل في صنف الإنسانيه , أما إذا أردت أن تحب وأن تحيا حياةً طبيعيه فأبحث عن من يكملك , عن من يقويك في لحظات ضعفك ويحجمك في لحظات جموحك , من يهديك أفكاراً لم تعرفها من قبل ويجلس ينصت بإهتمام إلى حديثك المعتاد

إن أحببت فأحرص ألا تضع من تحبه دائماً في موقف المتهم حتى وإن أخطأ , لا تجعل من تحب دائماً في خانة الدفاع عن نفسه , فإن كثرة الإتهام تجلب الفتور وإذا أحس المرء يوماً أنه في كل الأحوال متهماً فإنه مع الوقت لن يبالي , وإذا أردت حبيبك عظيما فعظمه

وأخيراً إعلم أنك إذا أردت أن تجرح من تحب وتهده هداً إجعله يشك في حبك وفي نظرتك له , فإن أردت أن تحافظ على حب من تحب فإياك أن تفعل ذلك معتقداً أنك تثيره وتشعل مشاعره أكثر لأنك في الحقيقه ترتكب بهذا الفعل أكبر إساءه في حق من تحب وفي حق نفسك وفي حق حبكما

أخيراً حبيبتي , لو كنت باحثاً في الحب عن من تريحني وتبهجني وتتفق معي ما أحببتك , ولكني أحبك ... فرجاءاً لا تجعلي من إعترافي هذا مبرراً لقتلي

بحكي معاكم

كنت عاوز اتكلم في حاجات كتير

كنت عاوز اتكلم عن إنفلونزا الخنازير وإزاي إننا بنتعامل مع كل حاجه في حياتنا بمنطق بكره تُفرج وإن شاء الله ربنا يسترها والشر بره وبعيد , وإننا دايماً بنبقى شايفين الخطر جاي بكل الحسابات العقليه والمنطقيه بس بنحب نحسبها بحسابات تانيه بنعتقد إنها بتقوم على الإيمان والتوكل على الله مع إنها بعيده كل البعد عن ده , والأخطر إننا بقينا بنفتقد الجرأه وبنقف عاجزين عن إننا نعمل الصح أو نصرح بيه عشان خايفين , يعني مثلاً كلنا أو معظمنا متوقع حدوث كارثه من موسم الحج السنه دي ومع ذلك كله خايف يقول كده وأولو الأمر خايفين يقولوا نأجل الحج السنه دي والنتيجه هتبقى خطيره ولكننا نفضل دائماً إنتظار البلاء بدلاً من صده , وقس على ذلك وزارات الصحه والتربيه اللي عارفه ومتأكده إنها مهما عملت فإستعداداتها هتكون غير كافيه في ظل موارد محدوده ومجتمع ثقافته ووعيه الصحي وسلوكياته العامه غير سليمه على الإطلاق ومتدنيه واللي مش مصدقني يسأل إنفلونزا الطيور وما إنفلونزا الطيور عنا ببعيد , لكن برضه إحنا مكملين ومتكبرين إننا نعترف إننا كدوله وبظروفها الحاليه يجب أن نتجه إلى تأجيل الدراسه هذا العام أكبر فتره ممكنه أو إلغائها .

كنت عاوز أتكلم كمان عن خسارة الوزير فاروق حسني لمنصب مدير عام منظمة اليونسكو , وكنت عاوز اقول اني من الناس اللي طالما إقترن إسم مصر بأي شخص في منافسه دوليه فأنا معه مهما كان هذا الشخص ومهما كانت رؤيتي له , فأنا مع من أحزنته الخساره من هذا المنطلق , لكن في نفس الوقت انا مش مع اللي زعلوا بداعي إن هذا المنصب كان هيضيف لإسم مصر ومكانتها في العالم , لأن ده غير صحيح , مكانة مصر مش هيعليها أو يكبرها منصب دولي هنا أو جايزه هناك , مكانة مصر هتعلى والناس هتشوفها كبيره لما مصر من جواها تبقى عاليه وكبيره , لما العالم يشوف مصر دوله غير عليله معندهاش مشاكل مزمنه مش عارفه تحلها وأمراض مستعصيه مش عارفه تخف منها , لما العالم يشوف أهل مصر سعدا ومبسوطين ومرتاحين ومحترمين في سلوكهم ومحترمين لأنهم مش مقهورين , هو ده اللي هيكبر مكانة مصر ويعليها , مصر طول عمرها مش ناقصها مناصب وجوايز , كان عندنا بطرس غالي أمين عام للأمم المتحده وكان عندنا محمد البرادعي مدير عام لوكالة الطاقه الذريه , وعندنا فاروق الباز مدير لمركز تطبيقات الإستشعار عن بعد بجامعة بوسطن بالولايات المتحده وأحد أبرز الرجال التي تعتمد عليهم وكالة ناسا وعندنا مجدي يعقوب جراح القلب العالمي اللي بيعمل معجزات طبيه , وعندنا خمسه مصريين حصلوا على جائزة نوبل منهم العبقري احمد زويل وللعلم هناك من يتوقع أن يحصل عليها مره ثانيه , ومع ذلك كل ده مشفعلناش لما حبينا ننظم كأس العالم وأخدنا صفر في التصويت عليه ولا هيشفع لنا في أي شيء قائم على منظومه لازم تبقى موجوده واحنا بنفتقدها ولا هيصد عنا أي خطر قائم على حسابات مصالح احنا مالناش فيها , اللي بيفكر إن مكانة مصر بتعليها المناصب عامل بالضبط زي المغني اللي عاوز يبقى عالمي فبيروح كل شويه يغني مع مطربين أجانب وميعرفش إن أول خطوات العالميه هي تحقيق أقصى درجات النجاح في بيئتك المحليه وإنك تكون أقرب الناس لعقول وقلوب أهل وطنك

كنت عاوز اتكلم في كل ده بس معرفتش , فهسكت احسن ويمكن أتكلم بعدين , المهم وبعيداً عن كل ده في الآخر لقيتني رجعت أدندن نفس الأغنيه اللي بدندن بيها طول الوقت اليومين دول : حبيبي ولا على باله شوقي إليه ولا شاغل باله انادي عليه وليالي كتير أفكر فيه وأحن إليه ولا داري
حد يقول له عيب بقى كده !!

أقوى فقره كوميديه في العيد

بجد بقى سيبكم من عادل إمام بأفلامه بمسرحياته بسلطاته بباباغنوجه , وسيبكم من الأفلام الحصريه بتاعة روتانا مش هتقدر تغمض عينيك , أقوى فقره كوميديه في العيد كانت خطاب العقيد معمر القذافي أمام الأمم المتحده اليوم !!

حرام والله , مهزله بكل المقاييس , وما يحزن النفس أكثر أن ما قيل على لسانه كان به الكثير من الأمور الصحيحه والمطالبات والحقوق الشرعيه العادله والمنطقيه ولكنها جاءت في إطار هزلي كوميدي فاضح مع الأسف مما يعطي إنطباعاً بهزلية هذه المطالبات وعدم أهلية طالبيها

ولمن لم يتابع الخطاب يكفي أن أنقل له جزء بسيط تتجسد فيه أقوى لحظات الكوميديا أو ما يطلق عليها صناع المسرح الفارس , عندما تكلم العقيد عن كل شيء وأي شيء وطرح كل القضايا بما فيها العراق وفلسطين وافغانستان وحقوق الإنسان والديمقراطيه ورؤساء أمريكا السابقين والحاليين آخذاً مع كل ذلك في التمهيد لنقطه كرر أكثر من مره أنها ستكون حساسه وتحتاج إلى كل تركيز وإنتباه , وبينما إنتظرت انا وأعتقد أن الجميع قد إنتظر هذه النقطه الحساسه التي سيفجرها العقيد في وجه العالم فإذا به يقول أنه يجب أن يتغير المقر الدائم للأمم المتحده من نيويورك لأن القادمين تكبدوا مشقة السفر لساعات طويله وعبروا المحيطات وإختلف عليهم التوقيت ومطالبين في نفس الوقت بأن يلقوا خطاب طب إزاي ؟ !!!, ثم ضرب مثلاً بنفسه أنه إستيقظ في الرابعه صباحاً بتوقيت نيويورك أي قبل الفجر بينما كان التوقيت في ليبيا الحادية عشر صباحاً !! وأنه يجب أن ينتقل المقر كل خمسين سنه إلى منتصف العالم مره وإلى الجزء الشرقي مره وأن المقر في نيويورك من اربعه وستين عاما وبذلك نكون قد تأخرنا أربعة عشر عاماً في نقله

طب بجد ممكن نقول ايه ؟ أعتقد لا حول ولا قوة إلا بالله وكفى

احترس هذا الفريق به سم قاتل

تعودت في الفتره الأخيره أن أحاول فلسفة ما يمر بي من أمور تثير أعصابي وتحبطني بطريقه تساهم في التخفيف علي وتجاوزها , وبما أني من المبتلين بتشجيع الزمالك - وهذا إبتلاء شديد لا يدركه إلا عشاق ومتابعي كرة القدم وخصوصا ذوي نفس الإبتلاء - فقد قررت بعد هزيمة الزمالك الأخيره من الإسماعيلي أمس أن أنقل للمبتلين من أمثالي خلاصة ما توصلت إليه من فلسفه عسى أن تنفعهم وتقيهم من التحول من ذوي الإبتلاءات إلى ذوي الإحتياجات الخاصه

إيييييييه فقد توصلت يا إخواني إلى أن العلاج الشافي والواقي لجمهور الزمالك يكمن في فكرة التصنيف , كيف تصنف نفسك ؟ ومن هنا أنصح كل زملكاوي أن يصنف فريقه الزمالك على أنه فريق كويس من أندية الدوري المحترمين اللي يتعملهم حساب , اللي لما المنصوره وبترول اسيوط يلاعبوه يستعدوا له مظبوط يعني مش أي كلام , واللي بعون الله وبدعم جماهيرهم من الممكن أن يحتلوا كل موسم مقعدا في المربع الذهبي , أكتر من كده مفيش , كما أنصح المشجع الزملكاوي أن يتحول من إنسان لديه روح التنافس والغيره وحب المكسب والبطولات والإفتخار بها إلى إنسان متسامي متسامح تلمؤه روح الموده الصافيه والروح الرياضيه الحقيقيه , إنسان يحب الرياضه من أجل الرياضه ويشجع اللعبه الحلوه أيا كان مصدرها

وفي حالة إصرار مشجعي الزمالك إنهم يحبكوها قوي ويعتبروا فريقهم فريق بطولات وبتاع , فإنني أهيب بمنظمة الصحه العالميه وكل الهيئات الطبيه المعنيه أن تدعم حملات للتحذير من خطورة تشجيع نادي الزمالك بنفس قوة وكثافة حملات التحذير من التدخين فبرأيي أن نادي الزمالك لا يقل أبداً في خطورته على الصحه العامه والسلام والأمن الإجتماعي عن خطر التدخين

وأخيراً تكتمل الليله المحبطه بهزيمة فاروق حسني في إنتخابات اليونسكو , حزنت كثيراً ليس حباً في وزير الثقافه وإنما حباً في الثقافه نفسها , فقد كنت أمني النفس بأن أرى وزيراً آخر لها قبل أن أنتقل إلى الرفيق الأعلى ....

وكل سنه وانتوا طيبين